ЗЯЛЁНЫ КОЛЕР
На карце вялікага свету
Яна – як зялёны лісток,
Сасмаглая песня лета,
Жывое вады глыток,
Адвечная калыханка,
Душы запаветны куток.
Трапеча гарачым ранкам
На дрэве нястомны лісток,
А ў навальніцу б'ецца,
Нябачны паміж лісця,
Як роднае матчына сэрца,
Што мне даражэй жыцця.
В.Вітка
Беларусь – цікавы і непаўторны край. Няма тут ні мора, ні высокіх гор, ні бязмежных стэпаў, ні пясчаных пустынь. Але нямала тут цудоўных зялёных куткоў, якія пакідаюць незабыўны след у памяці кожнага, хто тут жыве або наведвае нашу краіну ў якасці госця.
ЗЯЛЁНЫ колер - колер нашай цудоўнай прыроды: запаведных лясоў, духмяных лугоў, вясенніх палеткаў... Акрамя таго, гэты колер сімвалізуе жыццё, адраджэнне, маладосць і працавітасць...