Ільдэфонс Бобіч стаіць каля самых вытокаў сучаснай беларускай прозы, як Цётка, Ядвігін Ш., Якуб Колас. У пачатку ХХ стагоддзя ён атрымаў вядомасць як беларускі пісьменнік, які друкаваў свае празаічныя творы ў газетах “Наша ніва”, “Наша думка”, “Беларускія ведамасці”, “Беларус” (“Bielarus”) пад псеўданімам Пётра Просты.

   Перыяд актыўнай літаратурна-мастацкай дзейнасці Пётры Простага даволі кароткі. Аднак у сціплай спадчыне гэтага пісьменніка ўвасоблены павага да “простага” чалавека, шчырае імкненне служыць пакрыўджаным і зняважаным, спрадвечныя хрысціянскія каштоўнасці – вера, надзея, любоў.

   На жаль, у сучасны перыяд імя Ільдэфонса Бобіча мала вядома шырокаму колу чытачоў. У літаратуразнаўчых працах ён найчасцей сустракаецца толькі ў пераліках – сярод іншых імёнаў пачынальнікаў беларускай прафесійнай прозы. На сённяшні дзень адсутнічае поўная бібліяграфія тэкстаў Пётры Простага, не вызначаны этапы творчай эвалюцыі пісьменніка. У даведніках і энцыклапедыях змешчаны фактаграфічныя, да таго ж далёка не поўныя і не зусім дакладныя звесткі пра жыццёвы і творчы шлях І. Бобіча. Мастацкія і публіцыстычныя творы пісьменніка, якія публікаваліся ў  беларускіх перадычных выданнях першай трэці ХХ ст., так і не былі сабраны пад адной вокладкай ні самім аўтарам, ні яго нашчадкамі-паслядоўнікамі.

   Упершыню адносна поўна постаць гэтага паўзабытага літаратара была прадстаўлена ў 2005 годзе, калі ў анталогіі “Скрыжалі памяці” (у 3 кн.) надрукавалі адразу 7 тэкстаў Пётры Простага. Але многія прабелы ў звестках пра літаратурную і грамадска-культурную дзейнасць гэтай выдатнай асобы так і застаюцца невядомымі па сённяшні дзень.

   У працэсе знаёмства з архіўнымі дакументамі і ўспамінамі сучаснікаў святара бібліятэкары даведаліся, што ў яго была вялікая бібліятэка кніг XVIII-XIX стагоддзяў з асабістым экслібрысам. Пасля смерці Ільдэфонса Бобіча большая частка выданняў была спалена, іншыя – разабралі людзі.

   З улікам вышэйпералічанага былі вылучаны задачы пошукава-даследчай дзейнасці па збору, сістэматызацыі, афармленню і далейшай папулярызацыі матэрыялаў пра Ільдэфонса Бобіча:

- сабраць, вывучыць, сістэматызаваць і абагульніць разроненыя звесткі аб жыцці і творчасці І. Бобіча, і, як вынік, прадставіць карыстальнікам найбольш поўную інфармацыю пра легендарную асобу;

- знайсці і сабраць пад адной вокладкай творы І. Бобіча;

- правесці пошукавую работу выданняў з уласнай бібліятэкі Бобіча (падцверджаных экслібрысам, подпісам);

- паказаць ролю І.Бобіча ў гісторыі і культуры Іўеўшчыны,  прыцягнуць увагу грамадскасці да гістарычнага мінулага малой радзімы.

   Работа па збору і папулярызацыі інфармацыйных матэрыялаў пра Ільдэфонса Бобіча і іншых легендарных асоб Іўеўскай зямлі будзе працягвацца.

​​

*Звяртаемся за дапамогай да ўсіх, хто валодае дакладнай інфармацыяй пра нашага земляка і жадае прыняць удзел у папаўненні (удакладненні) прадстаўленай інфармацыі.

​​​